Susi Bentzulul

                                                             

Susi Bentzulul: te yalabyuts’take talemik ta slumal San Juan Chamula, manchuk lavie nakalik xa li’ ta Jobel bu ta xchanunaj xchi’uk spas te snichimal yabteltake.
Te Bentzulul ta k’ox to lik schan sts’ibael nichimal k’op, oy yak’oj ta ilel ta revista, ta pasbil jpech vun, jech noxtok slo’iltaoj ta buyuk ono’ox lumetik. Lavie oyik ta spasel nichimal k’op xchi’uk jun yach’il tsombail sbiinoj Snichimal Vayuchil li’ ta galería MUY, li’ ta Jobel.

Li’ k’usi ts’ibabil xtal li’ ta página li’e ja’ jun yamtel spasoj Susi Bentzulul. Li’ snichimal k’ope ja’ lok’em ta jpech vun sbiinoj Snichimal Vayuchil, pasbil li’ ta Jobel ta slikeb ja’bil 2017.

VAECH

Sokem xa li k'ak'ale
la spixun, la svolun li ak'obale
kejelpatal li jbek'tale ta bu mu'yuk k'usi oy
chnopaj talel sk'ak'alil li jlajele.

¿K'uxi mu xka'i?
yu'un spotset li jbek'tale
xch'ayet batel sbe jch'ich'ele
ch'ay batel jtse'imol ta sba jsat.

Xi'bal sba li lajele
xich' svokol li ko'ontone
xlamlun li jsate
chkiltik ta jchov ti jtuk oyun.

Chuvajel, jtuk ta jk'el jba
sujom, smeyun li chamele
kejel patalun o, chka'i sk'euj li mutetike
xlok' xa li jtotik k'ak'ale.

Li’ oy p’asojesbil ta kaxlan k’op:

 

Sueño

El día se ha destruido
la noche oscura me envuelve
mi cuerpo postrado en la nada
se acerca la hora de mi muerte.

¿Y cómo no sentirlo?
si mi piel se estremece
si mis venas desaparecen
si la sonrisa se aleja de mi rostro.

Que impía es la muerte
mi corazón ha de sufrir
mis ojos han de agitarse
sobre mis mejillas brota la soledad.

Qué locura, yo misma me observo
que al instante, la muerte me abraza.
Sigo postrada, escucho el canto de pájaros
el sol ha salido.

Deja un comentario